Ministri i Kulturës, Rinisë dhe Sportit, Hajrulla Çeku, ka reaguar pas djegies së Gjimnazit të vjetër “Ismail Qemali’ në Ferizaj.

Ai e ka quajtur krim aktin e djegës së gjimnazit derisa shtoi se përgjegjësit duhet të dalin para drejtësisë, shkruan Insajderi.

Çeku ka shtuar se metodat e porositë mafioze nuk do ta ndalojnë restaurimin e këtij objekti kulturor.

“Kontratën për restaurimin e gjimnazit të vjetër e patëm nënshkruar javën e kaluar. Dje kanë nisur punimet, ndërsa sot në orët e para të mëngjesit ia vunë flakën. Ky është krim. Përgjegjësit duhet të përballen me drejtësinë”

“Gjimnazi i vjetër “Ismail Qemali’ në Ferizaj do të restaurohet, i pëlqeu apo jo keqbërësve. Trashëgimia jonë kulturore është më e rëndësishme se interesat tuaja të ngushta. Metodat e porositë mafioze nuk na ndalojnë”, shkroi Çeku.