Derisa Kosova është në një periudhë vendimtare të liberalizimit të vizave, Ministri i Integrimeve Evropiane Bekim Collaku ka thënë se Kosova ka përmbushur kriteret që iu janë kërkuar në këtë proces.

Çollaku ka pritur sot në takime të ndara ambasadoren e Kroacisë në Kosovë Maria Kapetanoviq, ambasadorin e Austrisë Gernot Pfandler, ambasadorin e Sllovenisë Miljan Majhen si dhe shefin e Misionit në Ambasadën e Suedisë Henrik Nilsson.

Çollaku në këto takime ka thënë se Kosova ka përmbushur kriteret teknike për liberalizimin e vizave, njofton zyra e Ministrisë së Integrimeve Evropiane.

Ai po ashtu, ka informuar diplomatët evropian me ecurinë e tërë procesit të liberalizimit të vizave dhe ka vlerësuar se Kosova ndodhet në periudhën vendimtare sa i përket këtij procesi, transmeton lajmi.net.

“Kriteret e përcaktuara i kemi përmbushur. Tani presim vendimin meritorë që do t’i mundësojë qytetarëve tanë të lëvizin pa viza në shtetet e Zonës Schengen”, ka thënë ministri Çollaku gjatë këtyre takimeve.

Ai po ashtu ka falënderuar diplomatët e këtyre shteteve për përkrahjen e vazhdueshme që i kanë dhënë Kosovës në procesin e integrimit evropian dhe ka nënvizuar nevojën që këto shtete mike të vazhdojnë të mbështesin tani, liberalizimin e vizave.