Deputeti i Lëvizjes Vetëvendosjes, Enver Dugolli, ia ka kërkuar dorëheqjen u.d. të kryetarit të OVL-UÇK-së, Faton Klinakut, pas deklaratës për vrasje të kryeministrit, Albin Kurti.
Dugolli, me anë të një postimi në ‘Facebook’ ka thënë se veteranët duhet të kërkojnë largimin e tij dhe të distancohen nga “logjika e vrasjes si metodë e largimit nga pushteti”, shkruan Gazeta Insajderi.
“Pas asaj deklarate skandaloze dhe të rrezikshme e pakta që do duhej të ndodhte është dorëheqja e Faton Klinikat nga pozita e sekretarit dhe U.D. i kryetrit të OVL-së dhe kërkim falja si akt moral”, ka deklaruar ai.
“Veteranët e Ushtrisë Çlirimtare të Kosovës nuk bën të heshtin por urgjentisht të kërkojnë largimin e tij nga ai post duke u shprehur se nuk pajtohen me logjikën e vrasjes si metodë e largimit nga pushteti të Kryeministrit të Kosovës”, vijon Dugolli.
“Albin Kurtin shumë herë e kanë kërcënuar (madje gjatë luftës në burgjet serbe e kanë torturuar deri në prag të vdekjes) por nuk kanë arritur asnjëherë ta frikësojnë”, përfundon postimi i tij. /Insajderi.org/