Dështim historik dhe strategjik, e ka quajtur marrëveshjen e djeshme në Ohër, ish-kryenegociatorja në dialogun teknik Kosovë-Serbi, Edita Tahiri, shkruan Insajderi.
Tahiri shprehet se Kryeministri i Kosovës, Albin Kurti, pranoi marrëveshje pa njohje të ndërsjellë Kosovë-Serbi dhe me Asociacion të Komunave me Shumicë Serbe plus autonomi për komunitetin serb.
Mes tjerash, ajo u bëri thirrje deputetëve të Kosovës ta korrigjojnë këtë, që sipas saj, është dështim historik i vendit, duke mos e miratuar atë në Kuvendin e Kosovës.
“Kosova e fitoi luftën ndaj Serbisë, Kryeministri Kurti e dështoi Kosovën në tavolinë historikisht dhe strategjikisht. Pranoi marrëveshjen pa njohje me Serbinë, me asociacion dhe autonomi për pakicën serbe. Kuvendi i Kosovës dhe deputetët duhet ta bëjnë korigjimin e këtij dështimi historik duke mos miratuar këtë marrëveshje; të mos lejojnë këtë kapitullim të Kosovës përballë Serbisë, por ta jetësojnë kapitullimin e Serbisë në Kumanovë në 1999, të cilën e arritëm me luftën, gjakun dhe diplomacinë e mençur të shqiptarëve”, ka shkruar Tahiri në Facebook.