Rruga “B” në Prishtinë është bllokuar për qarkullim nga Policia e Kosovës, pasi kanë pranuar informatë se aty gjendet një mjet shpërthyes.
Rastin e ka konfirmuar zëdhënësja e policisë për rajonin e Prishtinës, Flora Ahmeti.
Ajo tha se policia ka dalë në vendin e ngjarjes dhe po menaxhon me situatën.
“Rreth orës 20:30 është pranuar informata për dyshimet që ndërlidhen me një mjet të dyshimtë në rrugën “B” në Prishtinë. Policia menjëherë ka dalë në vendin e ngjarjes dhe ka nisur ndërmarrjen e veprimeve të nevojshme për të menaxhuar me situatën”, tha Ahmeti.
Lexues të Insajderit kanë dërguar pamje nga vendi i ngjarjes, ku shihen njësitë policore duke ndërmarr veprimet e nevojshme.
Aktualisht një pjesë e kësaj rruge është mbyllur për qarkullim të automjeteve dhe këmbësorëve.