Graham Potter po shfrytëzon kohën që ka në dispozicion për të njohur më nga afër lojtarët. Pas largimit të Tuchel-it, pritet të ketë edhe ndryshime në hierarkinë ne lojtarëve.

Një ndryshim mund të jetë ai i majës së sulmit. “The Sun” raporton se trajnerit të ri të Chelsea-t i ka lënë mbresa në stërvitje Armando Broja.

Burime të brendshme të klubit kanë thënë për tabloidin britanik se Potter flet për potencialin dhe aftësitë e sulmuesit shqiptar për t’ju përshtatur më së miri sistemit të tij.

Me përshtypjen e bërë në stërvitje, Broja duket se po i siguron vetes një vend titullari në 11-shen e Chelsea-t, pavarësisht se pak më parë ka ardhur në skuadër një emër si Aubameyang-u.

Në mesjavë kur Chelsea barazoi 1-1 në Champions ndaj Salzburgut, Broja u fut në fushë në minutën e 65′ në vend të Aubameyang.

Për aq minuta sa luajti, Broja bëri diferencën në fushë duke spikatur me paraqitjen e tij, gjë që duket i ka bërë përshtypje edhe trajnerit Potter.