Trajneri i Minnesota United, Adrian Heath, thotë se nëse Alphonso Davies nuk do të ishte refuzuar nga katër apo pesë skuadra të Premierligës, ai tani do të ishte një yll atje. Tani mbrojtësi i Bayern Munich vlen 120 milionë euro.

Ish-ylli i Evertonit, Heath, i cili në 14 vitet e fundit ka punuar në Amerikë, ka zbuluar se ka kontaktuar me shumë palë në lidhje me kalimin e mundshëm të Davies në kampionatin anglez, por rekomandimet e tij në disa skuadra kanë hasur në vesh të shurdhër.

21-vjeçari bëri debutimin e tij në futbollin profesional në Vancouver Whitecaps 2, në moshën 15 vjeçare, përpara se të debutonte në skuadrën e parë pak kohë më pas.

Vlera e tij filloi të rritej prej paraqitjeve në MLS, kur Bayern e theu rekordin për blerjen më të shtrenjtë nga kjo ligë në vitin 2018 për marrëveshjen që vlente 18 milionë euro.

Heath ka thënë se skuadrat e Premierligës mund ta merrnin për një shumë më të vogël në kohën kur ai ia rekomandojë atyre si lojtar me potencial.

“Kur Davies ishte këtu, iu thashë katër apo pesë skuadrave që ta merrnin, por rekomandimet e mia hasën në vesh të shurdhër.”

“Bayerni shfrytëzoi rastin dhe ishin me fat, sepse tani lojtari vlen mbi 120 milionë euro.”

Përse skuadrat e Premierligës e refuzuan Alphonso Davies?

Në të kaluarën ishte zbuluar se Manchester United ishte ndër skuadrat që iu kishte ofruar lojtari, por ata vendosën se kanadezi nuk ishte për skuadrën e tyre.

Heath beson se refuzimet erdhën si pasojë që liga MLS nuk shikohet si ligë serioze, por vetëm skuadër që shërben për futbollistët të cilët janë afër pensionimit të vijnë të luajnë deri në varje të këpucëve.

“MLS, ende shikohet si vendi ku lojtarët evropian vijnë për t’u pensionuar.”

“Ndoshta kjo vlente vite më parë, por tani nuk është e gjithë situata ashtu. Shikoni Zlatan Ibrahimovic, për të thanë se kur erdhi në Amerikë, karriera e tij mbaroi, por jo. Ai fitoi kontratë sërish në Evropë dhe tani është kampion me Milanin në Serie A.“, transmeton Nacionale.

“Mund të flisni me Steven Gerrard, David Beckham, Andrea Pirlon apo Wayne Rooney dhe do të ju tregojnë për respektin që kanë për këtë ligë.”

Davies, i cili sezon që kaloi iu ndal hovi pas një problemi që kishte me zemrën, është paraqitur deri më tani në 115 ndeshje për Bayernin dhe tani është katër herë kampion i Bundesligës dhe gjithashtu njëherë i Ligës së Kampionëve.