Kreu i SPAK-ut, Altin Dumani, thekson se për çështjen e inceneratorëve është marrë nën hetim edhe kryebashkiaku i Tiranës, Erion Veliaj.

Këtë deklaratë Dumani e ka bërë gjatë një takimi me gazetarët në këtë fundvit. 

“Hetimet po vijojnë. Nuk ka përfunduar, ka persona të tjerë të përfshirë. Do të verifikohet çdo zyrtar”, u shpreh Dumani. 

Sa i takon Mirel Mërtirit dhe Klodian Zotos, ai theksoi se hetimet janë intensive. 

Pak javë më parë, SPAK lëshoi 15 fletë-arresti për aferën në inceneratorin e Tiranës. Raportohet se 4 persona janë vënë në pranga dhe të tjerë janë ende në kërkim.

Gjithashtu, urdhër-arreste ka edhe për kokat e inceneratorëve Klodian Zoto e Mirel Mërtiri, të cilët janë në kërkim ndërkombëtar edhe për aferat në dy inceneratorët e Elbasanit dhe të Fierit.

Sërish rëndojnë akuza ndaj Alqi Bllakos, ish-sekretarit të Përgjithshëm të Ministrisë së Mjedisit, të dënuar për korrupsionin në inceneratorin e Fierit.

CNA ka raportuar më parë se Taulant Tushe, drejtori i Përgjithshëm i Punëve Publike në Bashkinë e Tiranës do të vihej në pranga për këtë megaaferë./CNA