Ka eskaluar protesta e veteranëve, ata janë futur brenda oborrit të Kuvendit.
Një numër i konsiderueshëm i protestuesve kanë kaluar rrethojat, aty ku edhe zyrtarët policorë po e ruajnë.
Gazeta Insjaderi ju sjell momentin se si veteranët tentojnë të futen në oborrin e Kuvendit e përplasen me forcat policore.
Më shumë se asnjëherë janë parë zyrtarë policorë në gjendje gatishmërie para objektit të Kuvendit të Kosovës e Qeverisë. Po shihen edhe anëtarë të Njësisë Speciale e edhe snajperistë.
Pikërisht sot në ditën kur po mbahet protesta e dytë e organizuar nga veteranët e UÇK-së. Ata po protestojnë në shenjë pakënaqësie për miratimin e Ligjit për pagën minimale dhe mospërfshirjen e tyre.
Ata po kërkojnë rritje të pensionit.
I pranishëm në protestë është edhe ushtruesi i detyrës së kryetarit të OVL-UÇK-së, Faton Klinaku, i cili u shpreh se punë kanë me deputetë e qeveritarë që po e shkelin sipas tij ligjin.
“Këta deputetë që shkelin ligje e Kushtetutën nuk e kanë vendin këtu”, tha Klinaku para protestueseve.
“Ju kisha lutur që të jeni të qetë se ne nuk kemi punë me policinë, sepse policia është e jona. Ne kemi punë me qeveritarët deputetë që e kanë shkelur Kushtetutën”, ka bërë thirrje Klinaku.
Gazeta Insajderi ju sjell pamjet nga protesta.