Ish-seleksionuesja e Kosovës në futboll në konkurrencë të grave, Afërdita Fazlija, ka thënë se ndeshja e së premtes mes Zvicrës e Serbisë, ishte më tepër se ndeshje futbolli.

Zvicra e fitoi ndeshjen me rezultatin 3:2 dhe u kualifikua në 1/8 e Botërorit “Katar 2022”. Xherdan Shaqiri shënoi një nga golat e Zvicrës, ndërsa Granit Xhaka ishte kapiten dhe shtyllë në mesfushë.

Të dy kishin qenë cak i fyerjeve nga publiku dhe lojtarët serbë.

“Është me u habit se si Serbia nuk reformohet në atë drejtim dhe vazhdimisht mundohet që nëpërmjet sportit me e përcjellë agresivitetin me shtetet e Ballkanit në përgjithësi”, ka thënë Fazlija në 60 Minuta të KTV-së.

Fazlija ka thënë se është e papranueshme se në çfarë dimensione është shtrirë ky fenomen i urrejtjes te Serbia.

“Nuk kam parë kombëtare të tillë, është një prej kombëtareve edhe në Evropë edhe në rajon, që njihet si promotorë e gjërave të këqija. Patëm rastin ta shohim këtë edhe në nivelin më të lartë, siç është Botërori”, tha Fazlija. “Unë mendoj se Serbia ka mbetur në një terr sportiv. Nëse e analizojmë ndeshjen, tensionet nuk ishin kundër kombëtares së Zvicrës, por ishin kundër dy shqiptarëve, me theks të veçantë liderit dhe kapitenit të Zvicrës, Granit Xhakës”, tha Fazlija.

Ajo thotë se çasja e shtetit serb ndaj Kosovës nuk ka ndryshuar.

Fazlija ka thënë se gjithë ky tension ishte përgatitur qysh nga viti 2018. Dhe ishte për t’u habitur se gjithë publiku serb e bankina serbe, madje edhe seleksionuesi kishin orientim dy futbollistët shqiptarë.

Fazlija ka pasur vetëm fjalë të mëdha për Xhakën e Shaqirin.

“Granit Xhaka dhe Xherdan Shaqiri e sportistët tjerë shqiptarë, janë historia e gjallë e rrugëtimit tonë, e vështirësive me të cilat është përballur populli shqiptar”, tha Fazlija. /Koha/