Njohës të së kaluarës, pasionantë të fotografisë dhe koleksionistë tash kanë mundësi që t’i shohin fotografi të ndryshme të së kaluarës në një faqe të vetme internet, që quhet “Fototeka”, e cila është duke u shndërruar në një muze virtual shqiptar. “Fototeka”, përpos sajtit të saj, ka edhe një faqe në rrjetin social facebook.

Si muze virtual e kishte cilësuar edhe vetë Elva Margariti, ministre kulture në Qeverinë e Republikës së Shqipërisë.

“Mbi 7000 imazhe, ndarë në 7 periudha historike, shkrepur nga dhjetëra fotografë, kryesisht të juglindjes së Shqipërisë, shpalosin më shumë se një shekull histori. Me mbështetjen e Ministrisë së Kulturës, me kontributin e koleksionistëve privatë, Fondacioni “Art & Histori” hap një dritare ku mund të zbuloni imazhe që nuk i keni ndeshur kurrë më parë!’ – kishte thënë Margariti.