Fotoreporteri i luftës së fundit në Kosovë, Hazir Reka, këtë të diel hapi ekspozitën e tij personale, të titulluar “Rezistenca”.

Ekspozita personale e Hazir Rekës u hap në ambientit e hotel “Grandi” në qendër të Prishtinës.

Hazir Reka njihet si fotoreporteri që dokumentoi ngjarje të rëndësishme të Kosovës, demonstratat, luftën, masakrat e shpërnguljen e shqiptareve të Kosovës gjatë viteve 98-99. Punoi për kohë të gjatë në gazeta vendore e agjensione lajmesh ndërkombëtare.

Sipas njohësve të artit fotografik, kulturës dhe rrethanave shoqërore, kemi të bëjmë me një ekspozitë mjaft të rëndësishme e tejet domethënëse, të cilën duhet ta vizitojë secili që dëshiron të mësojë për të kaluarën e afërtë të Kosovë dhe dhunën, tmerrin dhe torturat nëpër të cilat ka kaluar vendi ynë.

Ekspozita e cila sjell fotografi të rezistencës së 29 gushtit të vitit 1990, risjell pas 33 vitesh në kujtesën kolektive periudhën e tmerrshme në popullit të Kosovës nën okupimin serb.

Për më tepër, kjo ekspozitë u hap në këtë ambient, meqë 33 vite më parë, pikërisht në këtë vend u mbajt edhe takimi me delegacionin amerikan, e ku Reka ka shkrepur me aparatin e tij momente delikate nga ai takim, e të gjitha këto imazhe u sollën sot para publikut.

I pranishëm në hapjen e kësaj ekspozite ishte i pari i Prishtinës, i cili në fjalimin e tij theksoi rëndësinë që e kanë këto fotografi në njohjen, përkujtimin dhe dokumentimin e ngjarjeve të vështira nëpër të cilat kanë kaluar populli i Kosovës. / Kultplus/