Kryetari i Aleancës për Ardhmërinë e Kosovës (AAK), Ramush Haradinaj po pret që Paneli Zgjedhor për Aneksa dhe Parashtresa (PZAP) sot ta certifikojë listën e plotë të kandidatëve për deputetë të partisë së tij.

Këtë optimizëm Haradinaj e bazon në zëvendësimin e tre kandidatëve që ishin në kundërshtim me nenin 29 pikën “q” të Ligjit për Zgjedhje.

Në të kundërtën, Haradinaj tha se do të ndjekin rrugët tjera ligjore për t’u ankuar në Gjykatën Supreme.

“Ne kemi propozuar tre zëvendësime në listë edhe poashtu kemi shpjegu situatën me doktor Dreshaj që ka kalu afatin tre vjeçar. Ne presim sot që të certifikohet lista jonë. Sido që të jetë nëse jo, ne do të ndjekim rrugët ligjore për t’u ankuar në Gjykatën Supreme”, tha ai.

Këtë qëndrim, Haradinaj e shprehu gjatë vizitës në ndërmarrjen “Higjiena” në Deçan, ku tha se kjo e fundit është duke bërë një punë të jashtëzakonshme për një Deçan të pastër.