Kryetari i Aleancës për Ardhmërinë e Kosovës (AAK), Ramush Haradinaj ka paralajmëruar se zgjedhjet e parakohshme në Kosovë mund të mbahen në pranverë. Kësaj deklarate i është kundërpërgjigjur deputeti i Lëvizjes Vetëvendosje, Mefail Bajqinovci.

Bajqinovci ka ironizuar me deklaratën e Haradinaj duke thënë se opozita, pra PDK, LDK dhe partia e Haradinajt çdo tre muaj thonë se do të shkojmë në zgjedhje.

Sipas tij, askush nuk po bëhet gati për zgjedhje.

“E para nuk po bëhet askush gati për zgjedhje, sepse ju e dini që partitë opozitare brenda tri vite të qeverisjes sonë, të kryeministrit Kurti, çdo tre muaj kanë thënë po shkojmë në zgjedhje në pranverë, në verë, në vjeshtë, e në dimër”, tha deputeti.

Deputeti i VV-së madje thotë se zgjedhjet do të mbahen ashtu siç ka paralajmëruar Kurti, pra në fund të këtij viti apo fillim të 2025-ës.

“Tashmë doli me deklaratë zoti Haradinaj që në pranverë do të mbahen zgjedhjet, por kjo është e pa vërtetë, sepse nuk ka asgjë të vërtetë rreth zgjedhjeve në Kosovë. Zgjedhjet do të mbahen të rregullta ashtu siç ka treguar kryeministri Kurti, e ajo do të jetë në fund të vitit 2024 apo në fillim të vitit 2025 në janar. Askush nuk mund të bëjë zgjedhje të parakohshme, sepse askush nuk i ka numrat përveç koalicionit aktual, listës ‘Guxo’ dhe mironiteteve“, tha Bajqinovci për Insajderin.

Bajqinovci është shprehur i bindur se nuk do të ketë rrëzim të Qeverisë Kurti.

“Nuk ka rrëzim të qeverisë, qeveria është duke kryer punën me sukses edhe këtë vit do të ketë shumë punë të mëdha për vendin, si në aspektin e investimeve kapitale e deri te politika e jashtme dhe nuk do të ketë nevojë për zgjedhje të parakohshme, sepse Kosova nuk e ka ‘luksin’ që çdo dy tre vite të shkojë në zgjedhje dhe ti harxhojë 10 milionë euro“, tha ai.

Gjatë bisedës theksoi se zgjedhjet nuk do të mbahen siç po pretendon opozita, por ashtu siç e thotë Kushtetua.

“Por duhet ta ketë një standard, që çdo katër vite të mbahen zgjedhjet dhe ta kemi fituesin e atyre zgjedhjeve, jo çdo tre muaj siç e ka thënë opozita prej që kemi hyrë në pushtet, ku çdo tre muaj ka thënë jo shkuam të dielën, jo të shtunën, jo këtë javë, jo në tjetrën. Andaj unë po e them me çdo përgjegjësi se zgjedhjet do të mbahen të rregullta ashtu siç e thotë edhe Kushtetuta”, deklaroi ai për Insajderin.

Çka tha Haradinaj?

Kryetari i Aleancës për Ardhmërinë e Kosovës (AAK), Ramush Haradinaj, ka paralajmëruar se zgjedhjet e parakohshme në Kosovë mund të mbahen në pranverë.

Madje thotë se të gjitha partitë politike janë bërë gati për zgjedhje dhe se vendi është tashmë në fushatë.

Haradinaj thotë se AAK-ja qëndron dukshëm më mirë sesa në sondazhin e publikuar së fundmi, derisa shton se i njëjti ka qenë i porositur nga partia në pushtet me qëllim të ndikimit në perceptimin e qytetarëve.

“Kjo që po ndodh është aromë zgjedhje… Të gjithë po bëhen gati për zgjedhje, jemi në fushatë, dihet që kemi hyrë në fushatë, por është e dhimbshme nëse partitë shpenzojnë dhjetëra-mijëra euro me “iu marrë mend” njerëzve, t’iu thuhet se ky është fituesi, ai është fituesi. Kështu ndodhi mashtrimi me zotëri Kurti atëherë”, u shpreh Haradinaj për KP.

/Insajderi