Kandidati për president, Ramush Haradinaj ka thënë se orientimi i tij për postin e presidentit lidhet me disa objektiva.

Sipas Haradinajt, objektiva e parë ka të bëjë me përballjen me Serbinë në planin e jashtëm, pastaj anëtarësimi në NATO si dhe unitetit i brendshëm.

“E para është përballja me Serbinë në planin e jashtëm. Pastaj objektiv është çështja e sigurisë në përgjithësi deri në anëtarësimin në NATO. Është çështja e unitetit të brendshëm. Të gjitha këto lidhen me respektimin e Kushtetutës dhe unitetit të vendit”, tha Haradinaj.

Lideri i AAK-së thotë se pasi Thaçi la vendin vakant të presidentit, ai kishte shprehur dëshirën për të marrë përgjegjësinë në këtë drejtim.

“Po të kishte president të zgjedhur në atë kohë ndoshta edhe garancitë për lirim me kusht të atyre që janë në Hagë do të ishin tjera nga ato që u bënë me Ushtrues Detyre të Presidentit”, tha ai.

Haradinaj thotë se AAK shpreson të arrijë disa ulëse në Kuvend me anë të cilave pretendon të arrijë ndonjërin nga postet kryesore.

“Ne pretendojmë të futemi në bashkëqeverisje pasi e dimë se nuk mund të arrijmë vendin e parë. Me anë të marrëveshjes qeverisëse synojmë të marrim njërën nga tri pozitat e para shtetërore”, tha mes tjerash Ramush Haradinaj në “Debat Plus”.