Kandidati për kryeministër nga radhët e LDK-së Avdullah Hoti ka komentuar vendosjen e marrëdhënieve diplomatike ndërmjet Kosovës dhe Izraelit.

Ai me këtë rast ka thënë se edhe një herë u dëshmua se marrëveshja e 4 shtatorit në Uashington ka qenë historike për Kosovën.

Hoti ka pasur një porosi edhe për të gjithë ata që ishin shprehur kundër kësaj marrëveshjeje.

“Kundërshtarët pres që së paku të falënderojnë popullin izraelit”, ka shkruar ai në Facebook.

Postimi i plotë:

Sot u ridëshmua se marrëveshja e Uashingtonit ka qenë historike, që e fuqizon sovranitetin e Kosovës, që e kthen Kosovën në nyje gjeostrategjike në Ballkan.

Partneriteti me SHBA e solli njohjen nga Izraeli, do ta sjellë hekurudhën për Durrës, gazin në Prishtinë dhe investime nga bizneset amerikane. Kundërshtarët pres që së paku të falënderojnë popullin izraelit.