Andy Bearpark ishte dikur aleati më i afërt i Margaret Thatcher, në Kosovë dikur shef i shtyllës së katërt të UNMIK-ut, që merrej me zhvillimin ekonomik. Ai tashmë ka një pamje krejt tjetër.

Pasi u hoq nga vëmendja e publikut, Bearpark është bërë pjesë e vendeve dhe një statusi fort të pamendueshëm për dikë si ai. Shtëpia e tij gjendet në një zonë rurale në Zelandën e Re, ku po synon ndriçimin e shpirtit.

Një nga figurat më të fuqishme në Britani të Madhe dhe njeriu kryesor në ekonominë kosovare paslufte, tashmë është kthyer në një praktikues të jogas me pamje krejt të çrregullt.

Në një intervistë për The Guardian, ai ka sqaruar se ideja për këtë lloj jete i kishte ardhur krejt rastësisht, teksa po vizitonte lokalitetin, transmeton Klan Kosova.

“Një ditë më ra ta shihja Rimutaka”, kujton ai, “dhe pastaj u ndala tek Featherston për një kafe. U ula dhe teksa po pija kafenë thashë me vete: “Këtu dua të jetoj””.

“Personalisht kam ëndërruar të vdes në një hotel ndërkombëtar, në barin e tij duke pirë me dikë, afër çastit të porosisë së një shisheje të dytë, thjesht duke u rrëzuar nga karriga, pa e paguar faturën. Por pastaj joga më ndërroi jetën”, kishte thënë ai.