Prokuroria Themelore në Prishtinë ka dorëzuar kërkesë në Gjykatën Themelore në Prishtinë për caktimin e masës së paraburgimit ndaj D.H dhe I.I., zyrtarë të Gjykatës Themelore në Prishtinë. Të njëjtit dyshohen për “Keqpërdorim të detyrës zyrtare”.
Kështu ka njoftuar Laureta Ulaj, zëdhënëse Prokurorisë Themelore në Prishtinë.
“Ju njoftojme se prokuroria ka paraqitur kerkese per caktimin e mases se paraburgimit ndaj dy te pandehurve, per shkak te keqperdorimit te detyres zyrtare”, tha ajo për Insajderin.
Ndryshe, Prokuroria Themelore në Prishtinë njoftoi të hënën se janë ndaluar dy zyrtarët.
“Prokuroria Themelore në Prishtinë, njofton opinionin publik se Departamenti për Krime të Rënda-Njësiti për Krime Ekonomike dhe Korrupsion me urdhër të Prokurorit të Shtetit ka ndaluar personat me inicialet D.H. dhe I.I., zyrtarë në Gjykatën Themelore në Prishtinë, për shkak se të njëjtit dyshohen se kanë keqpërdorur detyrat zyrtare, më konkretisht dyshohen se kanë kryer veprën penale “Keqpërdorimi i pozitës apo autoritetit zyrtar”, nga neni 414 i KPRK-së”, thuhej në njoftim.