Nexhat Krasniqi është përjashtuar nga Shërbimi Civil. Vendimi është marrë dje nga Komisioni Disiplinor, një ditë pasi Ministria e Infrastrukturës ka kërkuar ndërhyrjen e tyre për marrjen e një vendimi ndaj tij pas sanksionimit të tij nga SHBA-ja për pranim ryshfeti.

Krasniqi është përfshirë në listën e zezë të SHBA’së, për çka kishte njoftuar Departamenti amerikan i Shtetit më nëntor të këtij viti.

Ai ishte drejtor i Divizionit të Prokurimit në Ministrinë e Infrastrukturës deri atë ditë. Në MMPHI, po të njëjtën ditë u pezullua, por që u rikthye në punë disa ditë më vonë. Nga detyra e drejtorit të Divizionit të Prokurimit, atij iu ndërrua pozita në drejtor të Departamentit të Infrastrukturës Rrugore, që ishte më e lartë sesa pozita paraprake.

Dje, Komisioni Disiplinor e përjashtoi atë nga shërbimi civil, si masë disiplinore. Gazeta Online Reporteri.net e ka siguruar vendimin e Komisionit Disiplinor të Ministrisë së Mjedisit, Planifikimit Hapësinor dhe Infrastrukturës.

Gazeta Insajderi ka tentuar të kontaktojë me zëvendësministrin e këtij dikasteri, Hysen Durmishi, si dhe sekretarin e përgjithshëm, Izedin Bytyqi për ta komentuar vendimin, por të dy kanë qenë të paqasshëm.