Sot në Kosovë është duke qëndruar ministri i Drejtësisë i Danimarkës, Peter Hummelgaard, i cili është takuar me kryetarin e Kuvendit, Glauk Konjufca.

Në një komunikatë të Kuvendit të Kosovës është thënë se Konjufca ka vlerësuar si hap shumë të rëndësishëm nënshkrimin e marrëveshjes mes dy shteteve.

“Nënshkrimin e marrëveshjes ndërkombëtare mes Kosovës dhe Danimarkës kryetari Konjufca e konsideroi hap shumë të rëndësishëm, e cila, siç tha, intensifikon bashkëpunimin midis dy shteteve në fushën e drejtësisë, por edhe në fusha të tjera të interesit të përbashkët. Kreu i Kuvendit tha se ekziston vullnet i përgjithshëm për ta mbështetur këtë marrëveshje dhe për të filluar sa më parë implementimin e saj”, thuhet në komunikatë.

Të njejtën marrëveshje edhe ministri danez e ka cilësuar si hap konkret për vazhdimin e bashkëpunimit të mirëfillët mes dy shteteve.

Madje, anëtarët e delegacionit danez ka shtuar se Parlamenti i këtij shteti do të shkëmbejë përvoja me Kuvendin e Kosovës.

“Ndër të tjera, anëtarë të delegacionit danez theksuan se parlamenti i tyre do të shkëmbejë përvoja me Kuvendin e Republikës së Kosovës dhe do ta mbështes Kosovën në fushën e drejtësisë e në segmente të tjera, siç është procesi i integrimit euro-atlantik”, thuhet në njoftim.