Endrit Krasniqi e shpëtoi nga humbja skuadra e FC Prishtinës në derbin me SC Gjilanin, të dielën (dje) duke shënuar një super-gol nga gjuajtja e lirë.
Krasniqi në momentin kyç kur duhej të shfaqej për skuadrën e tij, ai u shfaq me një perlë të realizuar nga një distancë e largët për të shënuar gol.
Numri dhjetë i skuadrës kampione shënoi golin e barazimit 2:2, duke e shpëtuar skuadrëb bardh e kaltër nga humbja.
Mesfushori Krasniqi ishte ndër më të mirët e ndeshjes duke qenë pjesëmarrës në aksion edhe në golin e parë të Prishtinës, të cilin e shënoi Otto John.
Ky barazim dhe paraqitja ndaj Gjilanit, tregon se shpirti i skuadrës kampione ende ekziston dhe se do të luftojnë deri në fund të kampionatit.
Pas ndeshjes, trajneri i skuadrës gjilanase, Ismet Munishi në intervistën për “ArtSport” deklaroi se fajtori kryesor pse skuadra e tij barazoi ishte goli i Endrit Krasniqit.
“Goli i dytë ishte mjeshtri nga Endrit Krasniqi, me të vërtetë Endriti është një futbollist fantastik, nuk ki çka me shtuar aty. Endriti shënoi një euro-gol”, deklaroi Munishi, transmeton Insporti.com.
Ylli i Prishtinës, 27-vjeçar, këtë sezon është paraqitur në 15 ndeshje duke shënuar një gol dhe dhuruar tre asiste.
Prishtina pas 22 xhiro të zhvilluara renditet në pozitën e gjashtë me 26 pikë, ndërsa Gjilani në të dytën me 43 sosh. /Insporti.com/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2024 Gazeta Online Insajderi - Të gjitha të drejtat e rezervuara.
