Shkencëtarët në Kinë kanë krijuar me qeliza staminale një majmun me sy dhe gishta të ndezur. Majmuni jetoi për 10 ditë përpara se të eutanizohej dhe u krijua me qeliza burimore nga dy embrione që vinin nga e njëjta specie majmuni.

Majmuni i porsalindur kishte sy dhe gishta të gjelbër fluoreshentë dhe u krijua nga dy embrione majmuni gjenetikisht të ndryshëm.

Kjo arritje, thanë studiuesit, mund të ndihmojë nga kërkimet mjekësore dhe të ndihmojë në gjetjen e mënyrave për të ruajtur speciet e rrezikuara. Ky majmun njihet ndryshe si kimerë, pra kafshë që përmbajnë grupe qelizash nga dy ose më shumë organizma me lloje të ndryshme të ADN-së.

Kimerat janë të rëndësishme për studimin e zhvillimit embrional, por kërkimet janë kufizuar kryesisht tek minjtë kimerik që u krijuan për herë të parë në vitet 1960. Që atëherë, ato janë përdorur zakonisht në kërkimet biomjekësore.

Shkencëtarët mund të vëzhgojnë se si qelizat normale ndërveprojnë me qelizat e modifikuara gjenetikisht ose mutant te minjtë kimerik, në mënyrë që ata të kuptojnë proceset dhe sëmundjet biologjike. Megjithatë, ky hulumtim ka kufizime, prandaj studiuesit iu drejtuan majmunëve, thanë shkencëtarët.

Më të diskutueshme janë kimerat njeri-kafshë, të cilat përmbajnë qeliza njerëzore si dhe qeliza nga specie të tjera. Në vitin 2021, shkencëtarët në SHBA dhe Kinë njoftuan se kishin zhvilluar embrione kimerike njeri-majmun. Komuniteti shkencor shpreson që një ditë kimerat mund të ndihmojnë në plotësimin e kërkesës së madhe për organe për transplantim./abcnews.al