Shkruan: - Visar Duriqi

Eksperti i sigurisë Bedri Elezi të enjten ka bërë një denoncim në Prokurorinë Speciale. Penalisht e ka kallëzuar Kryetarin e Gjykatës në Ferizaj, Mustaf Tahiri. Ka ngritur dyshime se si Tahiri e kreu, sipas Elezit, fakultetin derisa ishte edhe me punë në Afganistan. Insajderi sjell detaje nga rasti, përgjigjen e Kryegjykatësit ferizajas dhe një intervistë me Elezin.

“Kryetari TAHIRI, gjatë periudhës së së lartshënuar ka qenë duke punuar në Afganistan, por në periudhën sa ai ishte duke punuar në Afganistan në Kosovë në emër të tij dyshohet se janë kryer edhe provimet e fakultetit, edhe pse i njëjti në atë kohë punonte në Afganistan. Dyshohet se në emër të tij për kryerjen e provimeve janë angazhuar persona të tjerë, kundrejt një pagese nga ana e Mustaf Tahirit, për të përfunduar kështu edhe fakultetin juridik në Prishtinë”, kështu thuhet një dokument që është deponuar të enjten në Prokurorinë Speciale të Kosovës nga eksperti i sigurisë, Bedri Elezi.

Një kopje të këtij denoncimi e ka siguruar Gazeta Insajderi. Elezi, në këtë denoncim pretendon se mënyra se si e kreu fakultetin juridik Mustaf Tahiri, tash me pozitë Kryegjykatës në regjionin e Ferizajt, është e dyshimtë.

“MUSTAF TAHIRI i lindur në Shkup dhe aktualisht me vendbanim në Ferizaj i cili drejton gjykatën themelore në Ferizaj, dyshohet se gjatë periudhës 2003-2007 ka kryer vepra të sanksionuara me ligj sipas kondit penal të republikës së Kosovës”, thuhet bë denoncim.

Sipas Elezit derisa Tahiri gjatë periudhës sa ishte edhe me punë në Afganistan, është e dyshimtë se si ka arritur që të hyjë në provime.

“Dyshohet se në emër të tij për kryerjen e provimeve janë angazhuar persona të tjerë, kundrejt një pagese nga ana e Mustaf Tahiri-it, për të përfunduar kështu edhe fakultetin juridik në Prishtinë”, ky është shpjegimi që Elezi i ka dhënë Prokurorisë Speciale.

Sipas tij, “Mustaf Tahiri dyshohet se ka kryer veprën penale të mashtrimit dhe poashtu veprën penale të legalizim i përmbajtjes së rreme, dhe kështu ka vazhduar duke kryer punën si gjyqtar poashtu edhe si kryetarë i gjykatës në Ferizaj”.

Në dokumentin e denoncimit, një kopje që e ka siguruar Insajderi, Elezi thotë se Konfirmimi i informacioneve nga ana e prokurorisë mund të bëhet duke vërtetuar periudhën e kryerjes së provimeve nga Mustaf Tahiri si dhe pagesat e pagës së tij për periudhën sa ishte duke punuar në Afganistan.

“Pushime në Kosovë nga Afganistani punëtorët i kanë kryer dy herë në vit” thotë Elezi në denoncim dhe shton se këto informacione për të cilat flasin shumë qytetarë në Ferizaj, e të cilat së fundi i ka dëgjuar nga një zyrtar i AKI-së dhe një gjyqtare në Ferizaj, “por të cilët nuk kanë guximin e deponimit të një deklarate të tillë”

Gazeta Insajderi ka realizuar edhe një Intervistë me Elezin, i cili ka konfirmuar se ka deponuar një denoncim kundër një Kryetari të Gjykatës Regjionale, por në intervistë nuk e përmend emrin.

Intervistën e plotë e gjeni këtu:

Gazeta Insajderi ka kontaktuar edhe Kryetarin e Gjykatës Themelore në Ferizaj, Mustaf Tahiri.

Krejt pretendimet ekspertit të sigurisë, Bedri Elezi ai i quan spekulime.

“Sa i përket denoncimit të këtij denoncuesi, dhe theksimet e tija aty janë veç spekulime dhe asgjë tjetër. Fakultetin juridik e kam përfunduar në Universitetin e Prishtinës sipas procedurave të rregullta, andaj dhe çdo theksim në këtë denoncim është veç shpifje ndaj meje”, ka thënë Mustaf Tahiri për Insajderin.

Ai nuk është përgjigjur në pyetjen e Insajderit sa i përket periudhës së punës së tij në Afganistan dhe kryerjes së provimeve në Prishtinë.

Insajderi ka siguruar është certifikatën e notave të tij, e të cilën ia ka dërguar edhe vet Tahirit, por ai ka pasur një përgjigje të shkurtër pa u lëshuar në detaje.

Këtu e gjeni certifikatën e notave të Mustaf Tahirit.

“Unë do të jem i hapur për çdo veprim dhe hetim nga institucionet përkatëse. Por po ashtu edhe ndërmarrjen e veprimeve ligjore për shpifje dhe cenim të autoritetit tim ndaj këtij denoncuesi në fjalë”, ka thënë Tahiri për Insajderin.

Sipas biografisë së tij në faqen e Gjykatës ai ka diplomuar në Universitetin e Prishtinës.

Mustaf Tahiri tregon se kur e ka përfunduar Fakulteti Juridik, e që është në vitin 2007, por jo kur e ka filluar atë. “… provimin e jurisprudencës e kreu në vitin 2012. Nga 01.02.2008 e deri më 31.01.2009 ka kryer praktikën gjyqësore në Gjykatën Komunale në Ferizaj. Nga 01.07.2009 e deri me 31.12.2010, ka ushtruar detyrën e zyrtarit ligjor në Gjykatën Komunale në Viti. Nga janari 2011 e deri me 31.12.2012 ka punuar si referent i ekzekutimeve në Gjykatën Komunale në Ferizaj. Nga maji 2013 e deri në maj të 2015, ka punuar si bashkëpunëtor profesional në Gjykatën Themelore në Ferizaj”, thuhet në biografinë e tij.

Prej dhjetor 2013 deri me prill 2015 ai ka ndjekur Programin për Trajnim Fillestar për Gjyqtar pranë Institutit Gjyqësor të Kosovës.

Me datë 19 maj 2015 është emëruar gjyqtar në Gjykatën Themelore në Ferizaj, në Departamentin e Përgjithshëm – Divizioni Penal. Gjyqtari Tahiri, me vendim të KGJK-së nga fillimi i muajit maj 2018, është transferar përkohësishtë në Gjykatën Themelore në Prishtinë – Departamenti për Krime të Rënda deri më 24 prill 2019.

Nga kjo datë Tahiri është gjyqtar në Departamentin për Krime të Rënda në Gjykatën Themelore në Ferizaj. Më 27 shtator 2021 Tahiri nga KGJK është zgjedhur kryetar i gjykatës për një mandat pesë (5) vjeçar. Mandati i z.Tahiri si kryetar ka filluar më 1 tetor 2021.

/Gazeta Insajderi.