Gjykata e Apelit e Kosovës e ka hedhë poshtë aktvendimin  e Gjykatës Themelore në Prishtinë me anë të së cilit, kjo e fundit e ka hedhur poshtë për shkak të jo kompetencës, padinë e Qeverisë se Republikës së Kosovës, kundër të paditurve Gjykata Ndërkombëtare e Arbitrazhit, me seli në Paris të Francës dhe kompanisë austriake që prodhoi pasaportat biometrike Osterreichische Staatdruckerei GMBH, me seli në Vjenë të Austrisë.

“Me anë të kësaj padie të ushtruar me 06.11.2014, Qeveria kishte kërkuar që të shqyrtohet vendimi i Gjykatës se Arbitrazhit lidhur me kompetencën e kësaj gjykate për të vendosur në kontestin ndërmjet Qeverisë së Kosovës dhe Osterreichische Staatdruckerei GMBH, duke propozuar anulimin e tij”, thuhet në njoftimin e Gjykatës së Apelit.

Departamenti i Çështjeve Ekonomike i Gjykatës së Apelit, ka vendosur që kjo çështje të kthehet në rigjykim, pasi që ka gjetur shkelje thelbësore të dispozitave të procedurës kontestimore dhe të drejtës materiale.

“Gjykata e Apelit, konstaton se pretendimet e gjykatës se shkallës se parë se gjykatat vendore janë kompetente për te vendosur vetëm lidhur me vendimet e arbitrazhit vendor dhe jo atij të huaj, nuk qëndrojnë, pasi që ligji nuk  parasheh një dallim te tillë”, thuhet në njoftimin e Apelit.

Sipas Gjykatës së Apelit, gjykata e Kosovës ka juridiksion të vlerësojë ekzistimin e kaluzolës për arbitrazh. Kjo kompetencë, sipas saj, buron nga Neni 14.5 i Ligjit të Kosovës për Arbitrazhin, i cili ligj është në përputhje të plotë me Konventën e Nju Jorkut, të viti 1958, dhe Ligjin Model UNCITRAL mbi Arbitrazhin komercial ndërkombëtar./Insajderi.com