Ndonëse nuk e kishte thënë asnjë fjalë për marshin që u mbajt në Prishtinë ku u kërkua drejtësi për ish-krerët e UÇK’së, sot kryeministri Albin Kurti është deklaruar për Gjykatën Speciale.

Në një postim në Twitter, Kurti ka shprehur shqetësimin e tij për siç tha ai rishkrimin e historisë nga Dhomat e Specializuara.

“Ishte kënaqësi të bisedojë me Matthew Campbell për artikullin e sotshëm të “The Times”. Kosova është mirënjohëse ndaj Britanisë së Madhe. Ekziston rreziku që Serbia të shfrytëzojë Dhomat e Specializuara për të rishkruar historinë dhe Rusia ta shohë Ballkanin si një front kundër NATO-s”, ka shkruar Kurti, përcjell Insajderi.

Në intervistën e tij të dhënë për gazetën prestigjoze, Kurti ka thënë se kurrë nuk e kishte mbështetur Specialen.

“Unë mbështes përgjegjësinë për luftën. Megjithatë, më duket e padrejtë që në qendër të vëmendjes po vihet Kosova, ndërkohë që Serbia jo vetëm që ka refuzuar të marrë përgjegjësinë për krimet e saj, por edhe i mohon ato”, ka deklaruar kryeministri. /Gazeta Insajderi