Kryeministri i Kosovës, Albin Kurti për gati dy javë ka qëndruar në Britani të Madhe dhe Irlandë.

Ai sot ka marrë pjesë në hapjen e fushatës së Partisë Evropiane të Socialistëve dhe Demokratëve për zgjedhjet evropiane që do të bahen më 9 qershor në 27 vendet anëtare të BE-së.

Nëpërmjet një postimi në Facebook Kurti është deklaruar për rëndësinë e këtyre zgjedhjeve.

“Këto zgjedhje evropiane nuk janë të rëndësishme vetëm për socialdemokratët e Evropës. Nga rezultati i këtyre zgjedhjeve varet demokracia evropiane dhe vlerat tona të përbashkëta: drejtësia shoqërore dhe sundimi i ligjit, kushtet e dinjitetshme të punës dhe luftimi i varfërisë, të drejtat e njeriut dhe barazia gjinore, beteja kundër regjimeve autoritare dhe mbrojtja e mjedisit, solidariteti dhe paqja panevropiane. Në thelb të këtyre vlerave të përbashkëta qëndron një premisë: respekti ndaj qytetarëve në mbarë Evropën”, ka shkruar Kurti.

Gjithashtu ai njoftoi se pjesë e konferencës është së bashku me një delegacion të Lëvizjes Vetëvendosje.

“Për këtë detyrë madhore, për drejtimin e fushatës zgjedhore, para fjalimeve përmbyllëse nga kancelari gjerman Olaf Scholz dhe sekretarja e Partisë Demokratike Italiane, Elly Schlein, u miratua në mënyrë unanime manifesti i PES-it si dhe z. Nicolas Schmit si kandidati i përbashkët i PES-it. Si anëtarë të PES që jemi, me një delegacion të Lëvizjes VETËVENDOSJE! mora pjesë në këtë kongres”, ka thënë kryeministri.