Leutrim Latifi, i arrestuari për grabitjen e armatosur në Prizren ku u plagosën dy qytetarë, dikur tallej me Policinë e Kosovës së bashku me partnerin e tij në krim, Kastriot Shalën, shkruan Gazeta Insajderi.

29 vjeçari Leotrim Latifi, i konsideruar prej vitesh si një prej personave më të rrezikshëm në Kosovë, i njohur për përfshirje në një mori grabitjesh të armatosura në Kosovë është arrestuar sot si i dyshuari kryesor për grabitjen e armatosur në një argjendari në Prizren ku mbetën të plagosur babë e bir, pronarë të këtij biznesi.

Ai, së bashku me partnerin e tij në krim, Kastriot Shalën, kohë më parë talleshin me Policinë e Kosovës nga një shtet i huaj, duke hyrë në transmetim direkt në Instagram.

Në fillim të videos dëgjohen duke thënë “hajdeni, pse s’po na kapni. Në qytet jemi s’jemi tu ik prej qytetit”.

Aksioni i Njësisë Speciale të Policisë së Kosovës për kapjen e Latifi u krye në ora 6 të mëngjesit të ditës së sotme.

Përveç Latifit, Policia ka arrestuar edhe të dyshuarin tjetër, Ibrahim Qadraku dhe një person të tretë i cili nuk është identifikuar ende.