Presidenca e Kosovës ka thënë se Qeveria e Kosovës nuk është konsultuar as koordinuar me Vjosa Osmanin për letrën që ia ka dërguar Asamblesë Parlamentare të Këshillit të Evropës, ku zotohet për përgatitjen e një draft-statuti për Asociacionin e Komunave me shumicë serbe.
Nga Zyra për media e Presidencës kanë bërë të ditur për Insajderin se Osmani “përkrahë vetëm qëndrime dhe veprime paraprakisht të konsultuara, të koordinuara dhe të dakorduara me institucionin e Presidencës si institucion kushtetues me kompetenca të qarta në fushën e politikës së jashtme dhe si gardian i funksionimit kushtetues të institucioneve”.
“Rrjedhimisht, Presidentja Osmani do ta mbështesë çdo veprim në drejtim të realizimit të këtij synimi, në përputhje të plotë me interesat shtetërore dhe Kushtetutën e Republikës së Kosovës. Prandaj edhe po bën përpjekje që shtetet anëtare të binden që sa më parë që të jetë e mundur të thirret një seancë e jashtëzakonshme ku do të votohet pro anëtarësimit të Kosovës në këtë organizatë”, deklaroi për Insajderin këshilltari për media i Presidencës, Bekim Kupina.
“Presidentja Osmani përkrahë vetëm qëndrime dhe veprime paraprakisht të konsultuara, të koordinuara dhe të dakorduara me institucionin e Presidencës si institucion kushtetues me kompetenca të qarta në fushën e politikës së jashtme dhe si gardian i funksionimit kushtetues të institucioneve. Kjo letër nuk është e tillë. Mund të jetë konsultuar e koordinuar me individë jashtë institucioneve që sot e kanë publikuar këtë letër, por jo me Presidencën”. /Insajderi.org/