Krijuesi i njohur kosovra, Faruk Tasholli, shpërblehet me çmimin letrar “Azem Shkreli”, që e ndan Lidhja e Shkrimtarëve, Krijuesve dhe Artistëve Shqiptarë në Gjermani.
Tasholli këtë shpërblim e mori për përmbledhjen e tij me poezi satirike, të titulluar “Akademia e zuzarëve”. Kjo vepër është vlerësuar për ligjërimin e saj të bukur, ironik dhe satirizues në raport me zhvillimet kulturore, shoqërore dhe politike në Kosovë.
Librin në fjalë e ka botuar shtëpia botuese prishtinase “Lena Grafik” gjatë vitit të kaluar dhe është pritur mjaft mirë nga lexuesi dhe dashamirësit e artit poetik e satirik të Faruk Tashollit, i cili shquhet për këtë mënyrë të shkrimit letrar e artistik.
Për lexuesit tanë, më poshtë do t’i japim disa vargje të poezive të këtij libri satirik të krijuesit Tasholli:
“Majë maleve t’Sharrit ç’po bie një tupan
A mbet kush n’Kosovë pa u ba politikan?
Sa për këtë zanat nuk duhet aq punë:
Kur bahet ai tjetri, pse s’e provoj unë?!
Ma mirë me m’thanë thiu se qe ky i ngrati
Gjithmonë mbret i botës mbeti vetëm fati!
A të shajnë gazetat e televizori
Po cilin prej marres jashtë e qiti vorri?!”
__________
“Jemi popull rrimë nën hije,
kampion për kangë trimnie,
fluturojmë bre sipër reve,
tavolinave t’kafeneve.”