Gazetarja shqiptare me prejardhje nga Kosova, Ozge Demirozu, e cila ka lindur dhe është rritur në Stamboll, ka ndarë një pjesë të rëndësishme të trashëgimisë dhe ruajtjes së gjuhës shqipe në një intervistë, transmeton Insajderi.

Në bisedën e saj, Demirozu theksoi se, pavarësisht jetesës në Turqi, ajo dhe familia e saj kanë mbajtur të paprekur traditat shqiptare, duke e bërë gjuhën shqipe pjesë të rëndësishme të përditshmërisë. Ajo tregon se në shtëpinë e saj nuk ishte lejuar të flitej turqisht, një vendim që e kishte marrë babai i saj, i cili gjithmonë ka insistuar që të flisnin vetëm shqip.

“Kam jetuar në Turqi, por gjithmonë kemi folur shqip. Në shtëpi ishte e ndaluar të flisnim turqisht. Babai ynë, një patriot i vërtetë, asnjëherë nuk ka folur turqisht me ne, vetëm shqip. Ai donte që të mos e harronim gjuhën dhe identitetin tonë shqiptar”, ka thënë Demirozu.

Ajo shpjegoi gjithashtu se babai i saj i ka lënë amanet që të vazhdojë kultivimin e kësaj trashëgimie, duke ruajtur gjuhën shqipe dhe lidhjet me identitetin shqiptar.