Shtëpia e njohur botuese “Logos-A” e ka botuar veprën “Emni Vehbije” të Tahir Efendi Gjakovës, i njohur ndryshe edhe si Tahir Boshnjaku.
Kjo vepër e shkruar në vitin 1835 me alfabet osman dhe e botuar në vitin 1907 në Sofje të Bullgarisë, vjen në një botim anastatik (të fjalëpërfjalshëm, ashtu sikurse është botuar për herë të parë), nën përkujdesjen dhe hulumtimin e Dr. Nuridin Ahmetit, historian dhe bashkëpunëtor i lartë shkencor në Institutin Albanologjik të Prishtinës.
Në këtë vepër autori shkruan për mirësjelljen, obligimet e njerëzve ndaj njëri tjetrit, për vlerën e diturisë, ndihmën ndaj skamnorëve etj.
Vepra iu shërben historianëve, teologëve dhe të gjithë ata që duan të njihen me shkrimet e mëhershme shqipe.
Historiani Ahmeti, në njoftimin e tij, për botimin e këtij libri, tha se ishte një nderim mundësia që i ishte dhënë për të kontribuar në këtë botim të veprës së Tahir Efendi Gjakovës.
Libri ka 192 faqe dhe është i botuar në formatin A5.