Presidenti francez, Emmanuel Macron ka thënë se do ta organizojë një samit për ta hequr dënimin me vdekje në botë, transmeton Gazeta Express.

“Njoftoj se më 9 tetor, Franca do ta rifillojë luftën për heqjen universale të dënimit me vdekje”, tha Macron në një fjalim në Paris me rastin e 40 vjetorit të heqjes së dënimit me vdekje në Francë.

Ai tha se si pjesë e presidencës franceze të Bashkimit Evropian në gjysmën e parë të vitit 2022, ai do ta organizojë një samit në Paris me organizatën joqeveritare “Së bashku kundër dënimit me vdekje” për t’i bashkuar shoqëritë civile të vendeve që ende kryejnë dënim me vdekje për rëndësinë dhe urgjencën e heqjes së tij.

Robert Badinter, ish-ministër francez i drejtësisë, i vlerësuar për heqjen e dënimit me vdekje në vend më 1981, tha se ishte absolutisht i bindur se dënimi me vdekje do të zhdukej në botë, sepse, siç tha, është një turp për njerëzimin.

“Ajo nuk e mbron shoqërinë, ajo e turpëron atë”, tha Badinter në një fjalim në Pantheon. Macron kujtoi se në vitin 1981, Franca ishte vendi i 35-të në botë që e hoqi dënimin me vdekje.

“Deri më tani, 106 shtete e kanë bërë këtë, dhe 50 kanë shpallur një moratorium de jure ose de facto për ekzekutimet”, tha Macron. Ai shprehu keqardhjen që të paktën 483 dënime me vdekje u zbatuan në 33 vende të botës vitin e kaluar. Ndëshkimi me vdekje është në fuqi, ndër tjerash, në Kinë, Shtetet e Bashkuara dhe Indi.