Qeveria e Kosovës mori sot vendim për të ndihmuar bizneset në tejkalimin e gjendjes së shkaktuar nga pandemia.

Vendimin për shtyerjen e bllokimit të llogarive bankare për tatimpaguesit që kanë obligime tatimore deri në fund të muajit prill, e ka publikuar sot ministri në detyrë i Bujqësisë, Besian Mustafa.

Mustafa ka shkruar se vendimi i ekzekutivit, po ashtu parasheh që të shlyejë ndëshkimet për tatimpaguesit që kanë detyrime tatimore ndaj ATK nëse kryejnë pagesën e tatimit bazë dhe interesit deri më 30.06.2021.

Postimi i plotë i ministrit Mustafa:

Për të ndihmuar bizneset në tejkalimin e gjendjes së shkaktuar nga pandemia, Qeveria e Republikës së Kosovës ka marrë vendim që:

1. Të shtyejë bllokimin e llogarive bankare për tatimpaguesit që kanë obligime ndaj ATK deri më 30.04.2021.

2. Të shlyejë ndëshkimet për tatimpaguesit që kanë detyrime tatimore ndaj ATK nëse kryejnë pagesën e tatimit bazë dhe interesit deri më 30.06.2021.