Në stadiumin “18 qershori” të Klinës po zhvillohet ndeshja e barazhit në Ligën e Parë të Kosovës në futboll mes Lirisë dhe Vushtrrisë, shkruan Insajderi.

Yjet e Kosovës, Vedat Muriqi edhe Milot Rashica po i përcjellin ish-skuadrat e tyre nga vendet përkatëse ku gjinden, respektivisht, Muriqi nga Mallorca dhe Rashica nga Anglia.

Muriqi në Insastorje postoi një fotografi, ku shihet duke e parë ndeshjen live – me mbishkrimin: “Hajde Liri”.

Sulmuesi prizrenas, Muriqi është produkt i akademisë së Lirisë së Prizrenit, klub me të cilin kishte nënshkruar më pas edhe kontratë profesionale.

Ndërsa, Rashica i cili aktualisht luan për Norwich Cityn, shfrytëzoi rrjetin social “Instagram” për ta përkrahur klubin të shoqëruar me një foto të vjetër.

Kujtojmë se, Vushtrria ishte skuadra që i ndihmoi lojtarit për të vijuar karrierën e tij si profesionist jashtë Kosovës. 

Ndryshe, 90 minutat e rregullt të duelit me Lirisë dhe Vushtrrisë nuk përcaktuan fituesin – kurse tani po zhvillohen minutat e vazhdimeve.

/Insajderi.org