Egla Ceno, fituesja e edicionit të 3-të “Big Brother Vip”, nuk ka qenë shumë aktive në rrjetet sociale. Mirëpo së fundmi ajo është rikthyer me një pyetje e cila ka zgjuar kuriozitet tek fansat. “Gjeni kush nga VIP-sat më ka block dhe pse”,- i ka pyetur Egla fansat e saj.

Përgjigjet e ndjekësve kanë qenë nga më të ndryshmet dhe sigurisht shumica lidheshin me BBV, e jo vetëm edicionin e shkuar po dhe për personazhet e dy edicioneve të para. Nga Luizi, Olta, Iliri deri te “bashkëjetuesit” e saj për më shumë se 4 muaj përgjigjet janë parë si fyerje dhe ironi.

Kujtojmë që brenda shtëpisë së BBV, aktorja ka pasur përplasje të forta me shumë nga banorët. Mirëpo Egla akoma nuk e ka konfirmuar se kush i ka bërë bllok në rrjete sociale. Edhe pse u bën 3 muaj nga përfundimi i “Big Brother Vip3”, ish-banorët e atij edicioni vazhdojnë të jenë në qendër të vëmendjes për publikun. Së fundmi është bërë e ditur se dy finalistët e “reality show-t” janë takuar në fshehtësi, pa i publikuar këto momente në rrjetet sociale. Bëhët fjalë për Julian Dedën dhe Egla Cenon, për të cilët u fol se do të jenë drejtues të emisionit “Fiks Fare”, por që, në fakt, nuk ndodhi. Këtë lajm e ka bërë të ditur vetë Blendi Salaj gjatë një interviste për “Wake Up”.

Ky takim i pa zbuluar deri më tani ka ngjallur shumë kureshtje për atë që ka ndodhur mes dy ish-banorëve. Sipas Salajt, takimi ka ndodhur pa praninë e kamerave dhe, çuditërisht, nuk është bërë asnjë foto publike që të dokumentojë këtë moment, gjë që ka habitur fansat e tyre, të cilët ndjekin çdo lëvizje të ish-banorëve. Ky fakt ka ndezur spekulimet rreth bisedës mes dy finalistëve, duke qenë se dy aktorët, edhe pas BBV kanë hedhur kunja të vazhdueshme për njëri-tjetrin.

Fakti që Egla u la jashtë “Fiks Fare” ka ngritur dyshime të mëdha. Pas fitores së saj, të shumtë ishin ata që menduan se aktores do t’i besohej drejtimi i këtij formati. Ndaj dhe duhet thënë se kalimi i Xhemit tek emisioni investigative, habiti jo pak publikun. Pak javë pas përfundimit të “Big Brother”, Egla u pa edhe në një takim informal me Ledionin, çfarë edhe na bëri të mendojmë se temë e diskutimit ishte edhe karriera e Eglës, pranë Top Medias. Por duket se diçka e tillë nuk ka ndodhur.

Egla jo vetëm që nuk u mor për drejtimin e Fiksit, por nuk do të jetë pjesë as e filmave që produksioni do të realizojë. Duke e ditur këtë vendim të stafit, aktorja ka vijuar me karrierën e saj, duke u rikthyer në set, këtë herë larg produksionit të “Top”-it. Egla Ceno, fituesja e edicionit të 3-të të “Big-Brother Vip”, vazhdon të jetë akoma në qendër të vëmendjes nga mediat dhe rrjetet sociale. Një pjesë e mirë e publikut duket se akoma nuk e pranojnë se ishte ajo që e rrëmbeu çmimin e madh. Mirëpo Egla ka vendosur t’u japë fund këtyre zërave duke thënë të vërtetën që fshihet pas fitores së saj. Me anë të një postimi në InstaStory ishbanorja e BBV ka thënë se e ka fituar edicionin e tretë për shkak të lidhjes familjare që ka me drejtuesit e “Top Channel”.

“Vendosa të them të vërtetën edhe pse dhemb, e vërteta dhemb. Të them të vërtetën pse si tek e fitova unë Bigun”, u shpreh Egla.

“Sepse ka pasur disa komente tuaja që kanë zbuluar të vërtetën kështu që nuk do të fshihem më dhe po e konfirmoj. Unë e fitova Bigun sepse Ledion Liço, prezantuesi është djali i burrit të tezes xhaxhait të hallës së tezes së babait nga ana e nënës, kurse Lori me Sarën që janë shumë të rëndësishme janë gocat e xhaxhait të tezës së nënës. Kështu që nuk kishte se si mos ta fitoja unë Bigun”.

Ndër të tjera ajo shtoi: “Po e them këtë gjë edhe pse do të më kushtojë shumë sepse nuk mund t’i tregoj sekretet e Bigut po e them se ju më zbuluat dhe është më mirë të them të vërtetën. Ja pra, kjo është arsyeja se përse unë e fitova Bigun “ Është mëse e qartë që ky postim nga ana e Cenos është një ironi për të gjithë ata që nuk pajtohen me faktin se ajo e ka merituar atë fitore. Kujtojmë që Egla doli në finale me Julian Dedën dhe Romeo Veshajn, por ajo arriti t’i mundte djemtë dhe ja doli të ishte femra e dytë fituese në të gjithë historinë e BB shqiptar, dhe e para për BBV.