Të vizitosh Ukrainën tani për të përjetuar se si është të jetosh në mes të një lufte, të shohësh qytetet e saj të bombarduara, të ndjesh rrezikun dhe të takosh luftëtarët e saj nuk ka të ngjarë të jetë në listën e dëshirave të askujt për udhëtime.

Por gjashtë muaj pasi Rusia pushtoi vendin, duke shkaktuar një valë vdekjesh dhe shkatërrimi, një kompani udhëtimi po fton turistët të vizitojnë vendin.

Platforma online Visit Ukraine muajin e kaluar nisi turne ditore me guida në të ashtuquajturat “Qytetet e guximshme” që vazhdojnë t’i rezistojnë pushtuesve rusë, duke u ofruar udhëtarëve një vështrim se si po jeton vendi mes konfliktit.

“Nisni në një udhëtim drejt Ukrainës së mrekullueshme tani,” kërkon faqja e internetit e kompanisë turistike.

Pavarësisht paralajmërimeve ndërkombëtare kundër udhëtimit në Ukrainë, kompania thotë se deri më tani ka shitur 150 bileta, ndërsa uebfaqja e saj që ofron informacione për udhëtime të sigurta drejt Ukrainës po merr 1.5 milionë vizita në muaj, 50% më shumë se para pushtimit.

CEO i Visit Ukraine Anton Taranenko thotë se turnet përfaqësojnë një shans për Ukrainën që të nxjerrë në pah frymën e sfidës së qytetarëve të saj, si dhe t’i tregojë botës së jashtme se jeta vazhdon, edhe në një luftë.