Manchester United po shkon nga e keqja në më keq. Rezultatet nuk janë më të mirat, siç dëshmohet nga humbja e mbrëmjes të së martës ndaj Galatasaray-t në Champions League (3-2), por problemet disiplinore po grumbullohen dhe ka një ndjenjë të dukshme, se trajneri Erik ten Hag ka humbur kontrollin e grupit.

Dhe një nga detajet që po shqetëson më shumë drejtuesit e klubit anglez janë rrjedhjet e vazhdueshme të informacionit brenda skuadrës të drejtuar nga trajneri holandez. Sipas shtypit anglez, shqetësimi ka të bëjë me një llogari anonime në rrjetin social ‘X’, ku zbulohen pothuajse çdo ditë shumë informacione private, të aksesueshme vetëm për lojtarët, trajnerët dhe disa anëtarë të drejtuesve.

Pikërisht aty shfaqen lajmet për 11-shen startuese, disa orë përpara se skuadra të zbulohet, si dhe informacionet përkatëse klinike, siç ndodhi kur u ndaluan Luke Shaw, Aaron Wan-Bissaka dhe Lisandro Martínez, të njoftuara përpara se disa shokë të skuadrës të dinin shkallën e vërtetë të problemeve.

Pikërisht për të gjitha këto drejtuesit e klubit kanë nisur një hetim të brendshëm të thellë, duke pranuar qartë mundësinë që të kishte një ‘spiun’ në strukturë. Dhe madje i kërkojnë edhe fansave mbështetje…

“Aktualisht, përgatitja për ndeshjet është aq e sigurt dhe e rëndësishme, saqë ky lloj informacioni për formacionet startuese dhe dëmtimet përfundon në internet duke i dhënë kundërshtarëve tanë një avantazh të jashtëzakonshëm”,- ka thënë një zëdhënës i klubit për “Mirror”.

“Tifozët e Unitedit duhet të ndjekin këto llogari, të cilat nxjerrin çdo ditë këtë lloj informacioni. Gjithashtu duhet të vënë në dyshim motivimet e tyre”, përfundoi ai.