![](https://insajderi.org/wp-content/themes/insajderi-org/logo/menu-insajderi.png)
Presidentja e Kosovës, Vjosa Osmani ka pritur sot në takim zv.ndihmës-sekretarin amerikan për Ballkanin Perëndimor, Gabriel Escobar.
Osmani duke i uruar mirëseardhje Escobarit dhe delegacionit amerikan në Kosovë, i ka falënderuar aleatët për mbështetjen ndaj Kosovës.
“I falënderoj aleatët për mbështetjen e vendit tonë këtë e dëshmon edhe vizita e Escobarit. Historia dëshmon se angazhimi i SHBA-ve është i pazëvendësueshëm. Sa më shumë angazhim nga SHBA aq më të mira janë rezultatet dhe stabiliteti në rajon. Në takim shpreha angazhimin tonë ndaj synimeve tona të përbashkëta. Kosova mbetët e përkushtuar për të mbështetur aleatët tanë në mbrojtje të paqes dhe demokracisë. Këtë e kemi vërtetuar në sanksionet ndaj Rusisë dhe përkrahjen e Ukrainës”, ka deklaruar Osmani, përcjell Insajderi.
Sa i përket procesit të dialogut, Osmani tha se Kosova gjithnjë ka qenë palë konstruktive në këtë proces.
“Kosova është e gatshme ta rrisë edhe më shumë angazhimin dhe gatishmërinë e saj që të intensifikohet procesi i dialogu. E shpreha shqetësimin për moszbatimin e marrëveshjeve të nënshkruara nga ana e Serbisë. SHBA nuk kanë aleatë më të madh sesa shteti dhe populli i Kosovës”, ka thënë presidentja. /Insajderi