Presidenti i Republikës së Kosovës, Hashim Thaçi qysh në ditët e para të tij, ka filluar ta njohë kreun e AKR-së, Behgjet Pacollin, si ish-president i vendit.

Më herët, parardhësja e tij, Atifete Jahjaga, gjatë mandatit të saj, e kishte larguar fotografinë e Pacollit, duke mos e njohur atë si ish-president.

Për këtë çështje, Behgjet Pacolli kishte shprehur pakënaqësinë e tij për shkak se Jahjaga nuk e kishte vendosur fotografinë e tij.

Mirëpo, gjatë kohës së Presidentës Jahjaga, fotografia e Pacollit është larguar, për tu rikthyer nga z.Thaçi.

Behgjet Pacolli, në një prononcim për Infopress, thotë se rikthimi i fotografisë nga Thaçi është e drejtë, pasi derisa ka dhënë dorëheqje nga posti i presidentint ai ka qenë president i plotfuqishëm.

“Vendosja e fotografisë është e drejtë, mbasi që unë deri te dorëheqja ime kam qenë president i plotfuqishëm i zgjedhur nga shumica e Parlamentit të Kosovës, ashtu si janë zgjedhur edhe të tjerët”, thotë Pacolli.

Sipas tij, Kushtetutën e ka shkelur në atë kohë kryetari i Kuvendit, i cili ishte Jakup Krasniqi.

“Shkeljet kushtetuese gjatë zgjedhjes time janë bërë nga kryetari i Kuvendit, i cili ka pasë për detyrë të organizojë zgjedhjen time në mënyrë të rregulltë”, është shprehur Pacolli.

Pacolli e kishte mbajtur pozitën e presidentit vetëm 37 ditë në shkurt dhe mars të 2011-tës. /Insajderi.com