Më 14 janar në rrugën “Xhorxh Bush”, do të protestohet me kërkesën për hapjen e kësaj rruge në qendër të Prishtinës. Kështu ka paralajmëruar faqja “Vrojtuesit e Lagjes”.

Përmes një postimi në Facebook, organizatorët e protestës kanë thënë se mbyllja e rrugës ka shkaktuar probleme në trafik e kolona të gjata.

“Pas mbylljes së rrugës, kemi përballur një problem të vazhdueshëm me trafikun dhe kollonat e gjata që kanë shkaktuar ndërprerje në qarkullim. Protesta jonë është e organizuar në mënyrë paqësore dhe e ligjshme për të shprehur nevojën tonë për të hapur këtë rrugë të rëndësishme për qytetarët e lagjes. Data e protestës është 14.01.2024, ku pritet të mblidhemi në pikën e mbylljes së rrugës Xhoxh Bush në një shenjë solidariteti dhe thirrje për veprime”, thuhet në njoftim.

Protesta do të mbahet me fillim prej orës 12:00.

Kujtojmë se, me vendim të kryetarit të Prishtinës, Përparim Rama, rruga në qendër “Xhorxh Bush” ka më shumë se një vit që është e mbyllur për qarkullim të automjeteve dhe është kthyer në shesh.

Rama ka përsëritur disa herë se sheshi do të zgjatet deri te rrethi i flamurit.