Një pastrues në një kolegj në New York shkatërroi aksidentalisht dekada kërkimesh duke fikur një ngrirës pasi donte që të heshte tingujt e “alarmit të bezdisshëm”.

Instituti Politeknik Rensselaer (RPI) po padit punëdhënësin e pastruesit, duke pretenduar se nuk kishte trajnimet e duhura. Sipas një padie të paraqitur në gjykatën supreme të New Yorkut në fillim të këtij muaji, universiteti po kërkon më shumë se 1 milion dollarë dëmshpërblim, raportoi gazeta Times Union.

“Sjellja dhe neglizhenca e njerëzve shkaktuan të gjitha këto”, tha Michael Ginsberg, një avokat për RPI-në për Times Union. “Fatkeqësisht, ata fshinë 25 vjet kërkime”.

Pastruesi, emri i të cilit nuk përmendet në padi, ishte i punësuar në “Daigle Cleaning Systems” dhe punoi në RPI për disa muaj në vitin 2020, kur ndodhi incidenti.

Frigoriferi i laboratorit përmbante disa kultura që ishin pjesë e një projekti kërkimor mbi fotosintezën. Ato ruheshin në -80 gradë Celsius.