Trajneri i Milanit, Stefano Pioli, u tregua shumë i indinjuar rreth vendimit të trupës së gjyqtarëve të sotme, të cilët vendosen që ta anulonin golin e Bennacer, që do ta rihapte ndeshjen, kur rezultati shënonte 2 me 0 në të mirë të Inter.

Pioli për Mediaset u deklarua në përfundim të derbit të Madonnina.

“Dëshironim ta fitonim këtë derbi dhe nuk ia dolëm. Rezultati ishte i rëndë dhe bindës, por në fushë nuk është parë e gjithë kjo diferencë. Inter ka shënuar në momentin e duhur. Ngushtimi i rezultatit prej 1 me 2 do të na kishte dhënë një mundësi, por pas atij episodi ndeshja u bë akoma më e vështirë”, shtoi trajneri i Milan, Pioli.

Kur në emisionin e pasndeshjes në rrjetin televiziv italian, Mediaset, eksperti i referimit, Cesari, shpjegoi situatën e krijuar rreth episodit të kontestueshëm në fjalë, Stefano Pioli largoi kufjet në shenjë irritimi.

“Më thoni një portier që nuk ka asnjë reagim pas një goli të pësuar, nëse mendon që pamja e tij ishte e mbyllur nga një kundërshtar. Handanovic as që protestoi”, deklaroi ai para se të largohej nga intervista pas ndeshjes.