Kandidati për kryeministër nga koalicioni LDK-AKR-Alternativa, Avdullah Hoti, ka thënë se LDK-ja ka një qasje ndaj gruas, e cila bazohet në merita.

Siç ka thënë Hoti, gratë e LDK-së që ishin në legjislaturën e shkuar, ishin aty me votë dhe jo me kuotë.

“Të gjitha zonjat që ishin në Kuvend, nuk kishin hyrë me kuotë, por me vota. Kjo tregon qasjen e LDK-së ndaj gruas”, ka thënë ai.

Ndërkaq, Hoti ka sqaruar se LDK-ja ka një plan të detajuar për përkrahjen e gruas, i cili sipas tij, bazohet në katër shtylla.

Shtylla e parë, ka thënë Hoti, ka të bëjë me fuqizimin e gruas në ligj, për të garantuar barazi gjinore. Gjithashtu, një shtyllë tjetër ka thënë ai është përkrahja e grave në arsim.

Shtylla tjetër që përmendi Hoti, ka të bëjë me përkrahjen e gruas në shëndetësi, për të cilin ai tha se tregon përkrahjen e LDK-së për gruan.

Ndërkaq, shtylla e fundit, sipas Hotit, që tregon përkrahjen ndaj gruas, ka të bëjë me ekonominë.

Ai ka thënë se gratë do të subvencionohen në bujqësi, duke krijuar grante të veçanta për to.