Sigal Prishtina e ka fituar ndeshjen e fundit të pjesës së rregullt të edicionit të Superligës së Kosovës në basketboll.

Prishtina të dielën fitoi në palestrën “13 Qershori” në Suharekë, në udhëtim te Ponte Prizreni, me rezultatin 109:71.

Me këtë fitore, kryeqytetasit konfirmohen në vendin e parë në tabelë, në sezonin e rregullt.

Prishtina që në çerekun e parë bëri shkëputje prej 19-të pikëve, 39:20, për të mos e lëshuar deri në fund epërsinë.

Gjashtë lojtarë të skuadrës mysafire shënuan pikë dyshifrore, ndërsa më i dalluari ishte Both Gach që realizoi 22 pikë, nëntë kërcime e tetë asistime.

Rrezart Memedi kontribuoi në fitore me 26 pikë, një kërcim e tri asistime, kurse Brooks Debisschop shënoi 18 pikë, pesë kërcime e katër asistime.

Vendësve nuk i ndihmoi loja e mirë e Adam Grantit që realizoi 21 pikë, dy kërcime e një asistim.

Prishtina e përfundon sezonin në vendin e parë me 50 pikë, me 22 fitore e gjashtë humbje, ndërsa Ponte Prizreni në vendin e parafundit do të luajë në plejaut.

Sigal Prishtina do të luajë në gjysmëfinale të plejofit me fituesin e ndeshjes Trepça – Bashkimi, kurse Ponte Prizreni do të luajë në plejaut me Borën.