Prokuroria Publike për Krimin e Organizuar në Serbi ka pranuar kërkesë për të dëgjuar presidentin serb Aleksandar Vuçiq në cilësinë e dëshmitarit lidhur me rastin “Panda” në Pejë.

Më 14 dhjetor të vitit 1998 persona të armatosur kishin hyrë në lokalin “Panda” në Pejë, duke vrarë gjashtë të rinj serbë.

Për këtë, Vuçiq më herët kishte thënë se thuajse e di se çfarë kishte ndodhur në kafenenë në Pejë.

Avokati që përfaqëson familjen e gjashtë të rinjve të vrarë, Ivan Niniq tha për Danasi se është në pritje të përgjigjes nga Prokuroria dhe se shpreson se do të jetë pozitive, sepse “çdo zgjidhje tjetër do të ishte shqetësuese”.

Sipas fjalëve të tij, familjet që përfaqëson ai kanë paraqitur kërkesa për dëgjimin e Vuçiqit si dëshmitar vetë disa herë më parë, por deri më tani nuk kanë marrë asnjë përgjigje nga Prokuroria.

Në Prokurorinë për Krim të Organizuar në Beograd në nëntor të vitit 2015 ka nisur hetimi për rastin “Panda”, por ende nuk është ngritur aktakuzë për këtë. /Insajderi.org/