Është publikuar në platformën për konsultime me publikun Plani i Menaxhimit për Parkun Arkeologjik Ulpiana- Iustiniana Secunda 2023 – 2027.
Ky dokument strategjik ka për qëllim sigurimin e kushteve për ruajtjen, promovimin dhe menaxhimin e lokalitetit Arkeologjik, pasuri e trashëgimise kulturore në mbrojtje të përhershme.
Lokaliteti Arkeologjik “Ulpiana” ka vlera universale të jashtëzakonshme si pikë gravituese e një peizazhi historik-kulturor shumështresor, i rëndësishëm për praninë e dëshmive të shumta fizike autentike që formojnë një peizazh karakteristik urban që nga shekulli I.
Përmes qasjes së integruar ndërdisiplinore synohet ruajtja dhe mbrojtja e kësaj zone me interes nacional dhe sigurimi i një mjedisi të përshtatshëm dhe miqësor për të dhe potencialin arkeologjik të saj.
Ruajtja e trashëgimisë arkeologjike nga të gjitha rreziqet e mundshme dhe parandalimi i përkeqësimit të gjendjes fizike nga faktorët e jashtëm njerëzorë dhe natyrorë përmes konservimit, në mënyrë që të mund të vihet në dispozicion dhe të bëhet i qasshëm për komunitetin në përgjithësi; Përmirësimi i kushteve dhe cilësisë së lokalitetit me qëllim të krijimit të një aseti të vetëqëndrueshëm duke përmirësuar qasjen për ofruar një sërë shërbimesh për vizitorët; Integrimi i Ulpianës me rrjetin e aseteve të trashëgimisë kulturore përreth me synimin të rritjes së ndikimit të përgjithshëm ekonomik në shfrytëzimin e vendeve dhe përmirësimin e identitetit mjedisor.