Izedin Bytyqi, sekretari i deritashëm i Ministrisë së Infrastrukturës, i emëruar nga LDK-ja pritet të gëzoj këte privilegj edhe në Qeverinë Kurti.

Burimet e Insajderit tregojnë se ai është i preferuari i udhëheqësve të Ministrisë së Infrastrukturës e Mjedisit për të mbajtur postin e ushtruesit të detyrës së sekretarit të kësaj ministrie, ani pse Bytyqit i ka skaduar mandati i sekretarit.

Ai kohë të gjatë ka qenë i preferuari i ish-ministri Arban Abrashi për të mbajtur postin e sekretarit të kësaj ministrie.

Bytyqi ka pasur raporte të afërta me ish-ministrin Abrashi edhe në të kaluaren. Abrashi ishte ministër i Punës e Mirëqenies Sociale, ndërsa Bytyçi sekretar i përgjithshëm i asaj ministrie.

Bytyçi derisa e mbante këtë pozitë ishte kritikuar se pati ndikuar në punësimin e resë të Isa Mustafës.

Edita Bajrami, gruaja e Besnikut, djalit të ish-kryeministrit Isa Mustafa ishte angazhuar si eksperte për të ndihmuar Ministrinë e Punës dhe Mirëqenies Sociale në rishikimin e Strategjisë Sektoriale, shkruan Insajderi.

Angazhimin e resë së ish-kryeministrit më 2017 e pati konfirmuar po Izedin Bytyçi, ish-sekretari në MPMS.

Ai pati thënë se Edita ishte angazhuar në kuadër të një projekti që, sipas tij, Ministria e pati ndërmarrë në bashkëpunim me Komisionin Europian për rishikimin e një strategjie të ministrisë.

Sekretari i tanishëm i qeverisë së udhëhequr nga Albin Kurti kishte tentuar ta mashtrojë edhe shtetin. Bytyçi në vitin 2011 nuk e kishte deklaruar pasurinë, derisa ishte udhëheqës i Divizionit për Buxhet dhe Financa në Ministrinë e Administrimit të Pushtetit Lokal, shkruan Insajderi.

Bytyçi ishte dënuar më 2012 nga Gjykata e Lartë për Kundërvajtje për shkak se e kishte shkelur Ligjin për Deklarimin e Pasurisë. Ai fillimisht kishte marrë një gjobë prej 2 mijë e 300 euro, vendim ky për të cilin ishte ankuar. Pas rishikimit të vendimit i njëjti ishte dënuar me 1 mijë e 500 euro./Insajderi.org