Rrjeti i Organizatave Jo-Qeveritare AVONET, është shprehur i shqetësuar pas pezullimit të licencës ndaj mediumit ‘Klan Kosova’.
AVONET ka thënë se vendimi për pezullim duhet të merret në përputhje me ligjet dhe institucionet kompetente për licencimin e mediave.
“Liria e shtypit është thelbësore për demokracinë dhe transparencën në shoqëri. Mediat e pavarura kanë rolin e tyre të rëndësishëm në informimin e publikut dhe zbulimin e çështjeve të rëndësishme. Vendimi për pezullimin duhet të merret në përputhje me ligjet dhe institucionet kompetente për licencimin e mediave. Në Kosovë, duhet të garantohet autonomia dhe pavarësia e medias nga ndërhyrjet politike”, thuhet në reagim.
Tutje, AVONET ka kërkuar të ruhet pavarësia e Klan Kosovës dhe të sigurohet vazhdimi i punës së tyre
“Autoritetet duhet të sigurojnë kushtet për lirinë e shtypit dhe të mbrojnë të drejtat e mediave. Rrjeti Avonet mbështet respektimin e ligjit dhe inkurajon përmirësimin e klimës për mediat në vendin tonë. Ne kërkojmë që të ruhet pavarësia e Klan Kosovës dhe të sigurohet vazhdimi i punës së tyre të rëndësishme në informimin e publikut. Liria e medias është një përparësi themelore në shoqëritë demokratike”, thuhet në reagim.