Sulmuesi prizrenas, Vedat Muriqi ka qenë edhe një herë protagonist tek Mallorca, duke shënuar golin e fitores në takimin ndaj Deportivo Alaves.

Kjo fitore ia mundëson Mallorcas të largohet sadopak nga zona e rrezikshme për të rënë nga liga.

Mallorca është e 16-ta në tabelë me 32 pikë, tri më shumë se Granada, e cila e mbyll zonën e ekipeve që bien nga liga.

Përfaqësuesi kosovar e gjeti golin e katërt në La Liga këtë sezon, ndërsa në rrjetin social, Instagram, Muriqi shkroi se do të luftojnë deri në fund për të mos rënë nga liga.

“Pirati është këtu dhe do të luftojmë deri në fund”, ka shkruar 27 vjeçari.

Muriqi është i huazuar në Mallorca për gjashtë muaj dhe klubi spanjoll ka vendosur të mos e blejë kartonin e tij, përkundër formës së mirë në të cilën po kalon në ndeshjet e fundit.