Romani “Mendim Drini” i shkrimtarit dhe intelektualit të mirënjohur kosovar, Jusuf Buxhovi, do të promovohet në Tiranë.

Promovimi do të mbahet të premtën, më 20 tetor, në orën 18:00, në Tirana Hotel Internacional (salla Metropol).

Promovimi i romanit është përfshirë në kuadër të manifestimit kulturor “Tetori i librit 2023”, që organizohet nga Qendra Kombëtare e Librit dhe e Leximit.

Romani “Mendim Drini”, shfaqet alterenativë e romanit “Udhëtimi i Mendim Drinit”, i botuar në vitin 2006. Është ky një eksperiment letrar mbase i veçantë kur i njëjti personazh (Mendim Drini) shfaqet në dy vepra, në dy role antagoniste, me dy karaktere. Në rastin e parë: të njeriut-kafshë. Dhe, në rastin e dytë: të kafshës-njeri. Dihomia e karaktereve psikologjike vendoset mbi konceptet e vullnetit për fuqi.

Në rastin e parë – “dije e fuqisë”. Dhe, në rastin e dytë – “ fuqi e dijes”. Kështu, personazhi Mendim Drini, në rolin alternativ të kafshës-njeri, ngrit paradigmën e transformimit të së keqes në të mirë si një ndryshim, me ç’rast, gjithnjë sipas konceptit të fuqisë së dijës dhe ndriçimit të mendjes, edhe ndjenjat me të egra (shtazarake) mund të transformohen në njerëzore deri te shkalla e mbinjeriut.

Romani ruan platformën kohore – atë të kryqëzatës së dytë kur kryqtarët normanë, në rrugë e sipër për te vendet e shenjta, zëvendësojnën kryqtarët tempelarë. Siç ruan edhe atë hapsinore – Bujarinë vasale të Përdrinit në Dardani, së cilës, lufta e qytetërimeve i kthehet në kob të përhershëm.

Ky roman i shkrimtarit Jusuf Buxhovi u botua nga Sh. B. “Faik Konica”, Prishtinë, 2023.